பிறெளவ்பி, (மட்டக்களப்பு இலங்கை)
(யாழினி, பிறெளவ்பிஆகிய இருவரும் கிழக்கு பல்கலைக்கழகத்தில் பட்டப்படிப்பை மேற்கொண்டு வருகின்றனர் அவர்களின் கவிதைகள் ஊடறுவில் நன்றியுடன் பிரசுரமாகின்றது.)
******
நானிழக்கும் சுயங்களின் முகவரிகள்..
ஏனிழந்து போகின்றன என்றறிய முடியாது
திணறும் கணங்கள்..
என்ன செய்வதென்றியாது
ஏங்கும் பொழுதுகள்..
போய்க் கொண்டிருக்கிறது வாழ்வு.
தனிமையின் பலத்தில்
பின்னடைந்து போன கண்கள்
கண்ணீரை விடுவிக்கின்றன.
வாழ்வுக்கான வேர்கள் – உன் வசமே
ஊன்றியிருக்க………
நம்பிக்கை நிரப்பி நீண்ட பொழுதுகளாய்
எந்தன் தவமிருத்தல் நீள்கிறது !
பாசம் முன் வந்து மோதி நின்றாலும்
என்னைச் செரிக்கும் – வார்த்தை வலிகளின் நிமித்தம்
சொற்கள் வர முடியாது..
மௌனம் பிசைகிறது!
இன்னும் சில நேரங்களில்
அகால மரணம் குறித்த
அதீத அச்சமொன்று எட்டிப் பார்க்கிறது!
அடயாளம் தொலைதலை
யாரிடம் சொல்லிப் பாதுகாப்பேன்?
